Noticias
Rosario Ustáriz presenta en Echo lo suyo libro: "MIQUETAS DE L'ALMA"

Lo pasáu día 16, en lo Pallar d'Agustín, a las 18:30h. se presenté en Echo la obra completa de la poetisa chesa Rosario Ustáriz.

La publicación d'esti libro s'ha plegáu a fer con la colaboración de l'asociación Bisas de lo Subordán.La presentación corrié a cvargo de la concellera de cultura de l'Ayuntamiento d'Echo, Marta Marín, como cordinadora de los triballos feitos por Bisas de lo Subordán.

En la suya presentación participeron chens de la cultura, como lo catedratico de Filoloxía Hispanica José María Enguita; de la politica municipal, l'Alcalde d'Echo Luis Gutierrez; d'otras asociacións aragonesas, como Francho Beltrán por lo Ligallo de Fabláns y Pepe Lera por l'Academia de l'Aragonés, de reciente creyación.

José María Enguita facié una brilante valoración academica de l'Autora, dedicandoli, en l'acabanza, bellas parolas en cheso. Ye qui presenta lo libro imprentáu.

L'Alcalde nos dié la sorpresa de que se ve a inaugurar la nueva blioteca publica municipal, bautizando-la con lo nombre de Rosario Ustáriz .

Lo Ligallo de Fabláns li otorgué lo reconocimiento que fan cada añada a chens de las letras y la cultura en aragonés.

Pepe Lera li comuniqué que l'Academia de l'Aaragonés l'ha nombráu Academica d'Honor con lo refrendo de lo II Congreso de l'Aragonés celebráu lo pasáu mes de Chulio.

La propia autora nos regalé la intrepetación de tres de los millós suyos poemas, plena de emoción y agradecimiento por sintirse tan aconboyada en esti día.

Como colofón, Luis Pedro Bráviz, profesor de organo en lo conservatorio superior de Zaragoza, y que ibié componiendo la musica d'una misa chesa escrita por Rosario Ustáriz, nos ofrecié, con lo suyo coro de voces chesas y acompañáus de clavicordio y violín, una de las composicions ya feitas por él, con muy grán aceutación de lo publico asistén.

La participación ciudadana estié abundante, respetuosa y emotiva. La casa de la Villa convidé con un abundante "piscolabis" a todos los asisténs.

NOTICIAS
IV TROVADA DE LETURAS EN ARAGONES (CENTRO CULTURAL DE LA CAI)

Feliciano Martínez (presidén de lo Ligallo de Fabláns de Zaragoza, organizaderos de lo evento) presenté l'auto, en lo que participeron importáns presonas de la vida publica aragonesa, como verez a continación.

Dezaga d'una charrada de Luis Miguel Bajén (mosico de lo grupo Biella Nuey), en do s'escuiteron bels cachez de grabacións d'un archivo de tradición oral, paseron a lierse testos escritos en aragonés, bels en standar, belotris en fablas patrimonials, con autuacións entrecaladas de cantautós y otris mosicos como Boira Preta.

S'arranqué Juan José Vazquez (Viceconsellero de cultura de lo Gubierno d'Aragón), siguíu de Ramón Tejedor (de lo PSOE) como representáns politicos. No liyeron mal, anque prexino que no entendeban lo que diciban.

Por parti de la Universidá, lo suyo Reutor, Felipe Petriz, lié "Las flamas de lo fogaril" de l'autor cheso Veremundo Méndez. Continé lo catedratico José María Enguita, con un poema de la chesa Rosario Ustariz intituláu "Lo puén viello". Ye d'agradecer la suya presencia, anque millor habrían estáu calladéz: No'n saben perreq d'entonacións, ni parez qu'entendesen guaire lo que yeran fendo. Cualisquier de los preséns habría liíu millor. No dixé d'estar sinificativo que los dos hesen eslexíu piezas en cheso pa una trovada de leturas en aragonés. ¿No será que ixa ye la "modalidá culta" antiparti de viva, que la Universidá considera como referencia?

Por parti de la recién creyada Academia de l'Aragonés, liyé lo suyo presidén, Manolo Castán (en patués), y bels miembros como Pilar Benítez (en ansotano) u Chusé Aragüés entre otris.

Antiparti, una rabera de convidáus que lieban cada cual lo que li cuacaba. Lo más gran aplauso lo se levé un grupet de alunnos d'una escuela, que interpreteron una pieceta de dialogo teatral.

Tardi a cubierto bien emplegada, habindo'n cuenta l'augua que cayeba entretanto en la carrera.

Bienplegáus enta este Blog, encamináu a meter en contauto a la chen de fabla chesa, con la millor intinción de fer aplego d'opinións y conocimientos sobre la la nuestra cultura, la suya defensa y promoción, aproveitando las nuevas tennoloxías.

Diz la estadistica (d'esti mesmo maitín) escuitada en la radio, que lo 39% de las familias han internet en la suya casa (me pienso que en la nuestra Val no'n será pa tanto). Si uno de cada tres chesos fuésenos capaces de fer parola (de baldes) por esti meyo, que tan ascape funciona, a los otris ya lis ne contaremos...

M'aganaría fervos plegar la situación que se i-veye de la val en fuera: Qué prexina sobre lo cheso la chen estudiosa de las fablas vernaculas, la situación global de l'aragonés y las suyas variedás.

Podemos charrar de cualisquier coseta que haya relación con lo cheso, empleando lo blog como si fuese un foro d'opinión.

Publicaremos cualisquier colaboración, dando a conocer cada cual las suyas habilidás lingüisticas y literarias, dixando que los demás nos corrixan u nos critiquen (siempre con la cortesía que ye menester).

Podemos ensayar l'adautación ta lo cheso de parolas (esta ye una d'ellas) cultas y mirar de trobar una forma de esprisión autualizada.

Podemos opinar de cómo aceutaríanos variacións en la forma d'escribir lo cheso, prencipalmen la grafía.

NORMAS DE CORTESIA

Se almitirán todas las opinións, siempre que sigan respetuosas con las presonas u triballos de que se charre. No se dixarán pasar comentarios que insulten u disprecien los ochetivos que astí se persiguen.

¿EMPECIPIAMOS ?

La situación de la nuestra fabla chesa, tal como yo la i-veo, ye bien aparecida a la borda de la foto (feita esti verano, en lo camino de Ciresa ent'Ansó). Podez vier que bi-há bels elementos conserváus, como los cantos de la puerta y la finestra, asinas como los cabeceros feitos con peñas verticáls. Agún parez que puedan aguaitar bel ibierno más (si no las se puyan a buscar, p'acotraciar beluna casa nueva). Las peñas, que en lo suyo diya yeran bien chuntetas, se ven esboldregando; de lo telláu, no'n queda ni rastro. La puerta de dentrada no emplea mas que una zapotada... y ya ibiés dentro; ixo sí, si no has miedo a que t'aplane bel bolo...

En ixas i-semos cuando lo Gubierno d'Aragón prexina levar enta deván una Ley de Lenguas (en esta lexislatura no lo me crío, sería masiáu apurar...), que ya ve por lo tercer u cuarto antiproyeuto.

Por otri costáu, la iniciativa privada, más coscién de lo peligro de fundimiento, ha metíu en marcha la creyación de l'Academia de l'Aragonés, en la que uno de los ochetivos ye la salvaguarda de las variedás locáls. De todo esto podemos ir afondando y discutindo.