INAUGURACION D'UN ORGANO "AÑAÑOS" EN SAN PEDRO DE CIRESA
Lo pasáu domingo 1 de chulio se celebré la inauguración d'un organo en la ilesia monasterio de San Pedro de Ciresa (Val d'Echo).

"L'organero de Berdún", José Antonio Pérez Añaños (foto de la dreita), de ascendencia familiar en Embún (Val d'Echo), ha estáu lo artesano encargáu de atrapaciar lo istrumento, pieza por pieza, durante una añada de triballo, que l'ha feito retrasar la suya chubilación.
Autodidauta por naturaleza, aprendié l'oficio d'organero estando en Australia, de choven, sinde mas aduya que manuals escritos y la suya curiosidá y esfuerzo. Me conté que aprendié a manellar lo tecláu dibuxando las teclas en un papel aluengáu y siguindo un manual de piano pa prencipiantes. Ha corríu muito camín hasta estar capaz de fer u reparar organos de cualisquier mena, dende fundir lo estaño de las flautas metalicas hasta manellar lo embero. Cuasi parez mas un orfebre que un artesano.

De la mano de l'organista cheso Luis Pedro Bráviz (profesor d'organo en lo conservatorio profesional de mosicade Zaragoza), a la vez que direutor de la capilla de mosica "Sebastián Alfonso", a la par d'una misa concelebrada, se interpreteron piezas de J.S.Bach, Nicolás Ledesma, Andrés de Sola y lo propio L.P.Bráviz, autor d'un Ave María en cheso (letra de Rosario Ustáriz). Estieron convidáus tres voces femeninas de Ciresa y lo choven violinista Adrián Lagraba.

Asistié publico de toda la val, que apludié los solenmnes autos celebráus con goyo y almiración.




No hay comentarios: