FAGO

A nui tardi(*), en la Biblioteca d'Aragón (Zaragoza, carrera Dr.Cerrada,22), se facié la presentación de lo libro "EL ARAGONÉS ANSOTANO-Estudio lingüístico de Ansó y Fago", de l'autor Miguel Ánchel Barcos, editáu por "Gara d'Edicións".

Miguel Ánchel ye de Fago (lo suyo pai), y ha feito un triballo que complementa lo de Pilar Benítez, seguntes la sabironda opinión de Artur Quintana, filologo de prestichio que intervenié en la presentación, chunto con Chabi Lozano, filologo estudioso de lo belsetán y otras variedás d'aragonés, y que facié un analís teunico y serio de lo triballo de l'autor.

Somos deván d'otra obra feita por un "autóctono" sobre la luenga aragonesa. Él ya diz que la suya visión de l'ansotano ye como parti d'un conchunto de fablas que conforman l'aragonés. Lo que no ye poqueta cosa, si hemos en cuenta que, en cada lugar, u en cada val, prexinamos estar lo melico de la fabla, y nos hemos pasáu sieglos precurando diferenciarnos de los vecíns a la hora de charrar (cosciéns, u incoscientemen, por afán de reforzar la identidá).

Me clama l'atención que l'autor no s'haya atrivíu a escribir lo libro en la misma fabla a la que dedica lo estudio, convencíu como'n só de que lo habría sabíu fer bien, sinde guaires problemas, anque pué'star que, allora la difusión "bi'stase"(como se diz en Ansó) más chiqueta, y la obra se quedase acotolada, implíndose de plovo por las librerías.

Me faría goyo consiguir lo testo de la presentación de Chabi Lozano (miraré si la me dixa y me da permiso pa adibirla en esti blog). Aparti de la suya valura academica, la presentación ye escrita en belsetán, por lo que, a los chesos, nos aduyaría a ir conociendo mas a fundo las otras variáns de la luenga común (?) (si bel día se plega a estomagar que ixa unidá ye un feito).

(*) - Las esprisións: a nu tarde/ anui tarde/ anitarde, u la de: se fa de nuites estieron replegadas por J.J.Saröihandy fa más de cien añadas, igual en Echo que en Ciresa.


Lo Grupo Val d'Echo amuestra lo suyo repertorio en la Puerta Alta de lo Monasterio de San Pedro de Ciresa.

Lo pasáu cabo semana, 11/13 de mayo, una representación de l'asociación ARAMIS de Francia, estié de vesita por la val d'Echo, de la mano de la concellera de cultura de la Villa. Lis s'amostré toda la redolada, paisaches, museos, megalitismo, gastronomía, fabla...
Dentro de los autos culturáls destaqué la conferencia que lis dié Marta Marín sobre la fabla chesa y l'autuación de lo grupo Val d'Echo. De siguro s'han leváu güen remero d'esta val...