Y agora, ¿qué?


L'Academia de l'Aragonés ya'n ye estada en Echo. No m'agana fer la cronica de l'auto. Prefiero que liyaz lo que se diz en la prensa:


Me parez más apropiáu fer bella reflesión, u mirar de sacar las conclusións que ixe auto habría que implicar pa los chesos.

No ha estáu chiqueta la falaguera que l'Academia s'ha leváu preparando la presentación en Echo. Prexino que Luis Gutiérrez (l'Alcalde d'Echo) tamién s'habrá leváu la suya antis de dixar claro en lo suyo discurso que, como representante de los chesos, demandaba a l'Academia muito respeto por la nuestra cultura.

Ixa demanda, amás de chusta, encierra lo reconocimiento de l'autoridá lingüistica que deván d'él se presentaba. Ne son muitos los chesos que, d'una u otra manera, s'han dau por enteráus de que l'Academia esiste, a lo menos, los que escriben. Y agún no he sintíu guaire comentario contra l'Academia.

Ixo no tira que bi-haya recelos u dudas, normals por otri costáu, dimpués de muitas añadas de desconfianza en la chen de fuera que ha metíu la nariz, u lo cazo, en la cultura propia de las vals pirenencas, pa lugo venir a vendernos la nuestra pelleta cambeada d'olor y color. Nunca han medráu los vendedós de cheleras en Siberia...

Agún li queda a l'academia bel otri toro que lidiar. Las vals orientals no'n son menos resabiadas que las ocidentals. Los escritós "patuesinos", u "ribagorzanos", asinas como los suyos alcaldes y vecinos, agún han que darse por enteráus de que l'Academia "tamién son ellos". Ye d'aguardar que, en los meses venideros, se complete ixa proyeción social de l'academia con los millós resultáus posibles.

Pero, tornando ta lo d'antis: Agora, ¿qué?:

¿Ye plegada la hora de tragar los zapos y cullebras de la "normalización"? L'Academia, amás de investigar las fablas patrimonials, ha la misión de normalizarlas, tirando castellanismos, introducindo cultismos y neoloxismos, asinas como unificando una grafía que siga aprebada por todos los escritós y editós de cualisquier modalidá, incluída la estandar.

¿Sabremos los chesos estar a l'altura de las circunstancias? Lo tiempo lo dirá, pero habría qu'empecipiarse a fer propuestas por parti de l'Academia, por vier lo grau d'aceutación que los chesos imos a dar.

No hemos que quedarnos solo en celebracións que, por cierto, estieron bien animadas, igual en "Lo Foratón" que en "Acher", hasta las seis de lo maitín. Podez vier bella foto: