Homenaxe a la Orquestina del Fabirol

Lo pasáu 1 de diciembre, Roberto y Elena, fundadós de la Orquestina del Fabirol, habieron un acidente de coche, cuando tornaban de autuar de lo lugar en fuera. Lo engulema estié que, aparti de las lesións fisicas, chaferon lo furgón con todos los istrumentos que levaban.

L'han podíu contar, lugo de pasar por l'hospital de Balbastro y, una bagada meyanamen recuperáus, estieron homenaxeáus lo pasáu sabado 19 de enero por la chen de lo mundet mosical y de l'Aragonés.

Se celebré una cena en la Casa Emilio de Zaragoza, en do cuasi una cuarentena d'asistens, representando toda mena d'asociacións, los acomboyeron en un auto cuasi sorpresa. Bi-habié una veila literario-mosical plena de "pucherez" por parti de los protagonistas, muy emocionáus por lo evento que lis heban preparáu a escondidas.

Me facié goyo acudir representando a lo Grupo Val d'Echo, y lis dixé unas parolas, como si fuese un pregón, de parti de lo grupo cheso. Igual ye una fatera que las vos meta a continación, anque, ¿porqué han que quedarse en lo tintero? Astí ven:


PREGÓN TA LA ORQUESTINA
(Con un fuerte abrazo de Pepe, Juanjo, Javier, Lugi, Pablo, Amaya, Alfredo, Antonio, Chuso, Paco, etc, etc, de todo lo Grupo Val d’Echo).

De parti de la Val d’Echo
hemos que fervos saber
que una Orquestina con tino
pa cutio se fa querer.

Hez pregonáu la cultura
d’esta tierra por doquier
y la hez feito mas polida
y mas facil d’entender
a traviés de la mosica
que ye lo vuestro quefer.

De adedicar meya vida
ne sabemos un ratet:
los de lo grupo Val d’Echo
tampoco en somos d’ayer.
En esti luengo camino
bi-há desanimo a ratez,
que se cura con amigos
y mosicas pa tañer...

Hez a siguir lo triballo
millor antis que dimpués
no se siga que las vals
se nos vacíen de chen
por no haber titiritero
que bien los faga arrier
u lis cante en fabla propia
de los suyos menestés.

Y, por ixo, en estos días
que vos toca padecer
aimamos aconvoyarvos
en chunto con esta chen...
pos ya diciba la canta:
cuando l’uno ve a cayer
l’otri devanta la vela
pa que se i-vea de nuey.

U millor, cantando entre todos...

CUANDO L’UNO CAYE
L’OTRI A DEVANTAR
S’HA FEITO DE NUEY,
AGUARDAMOS YA
LO PEITO ME BRINCA...
¡VOS QUIERO ESCUITAR!