TERTULIA SOBRE LA FABLA CHESA

Lo pasáu sabado, en lo pallar d'Agustín d'Echo, nos achuntemos un catorcén de fabladós y/u escritós chesos, asinas como bel forano radicáu en la val d'Echo, a lo redol de la convocatoria de tertulia ubierta sobre la situación de la fabla chesa.

La tertulia estié convocada por iniciativa de Pepe Lera y conforme con lo parecer de Juanjo Lagraba y Marta Marín. Plantiada como una ocasión de tastar la opinión de los chesos deván de bellas de custións como:
- Lo cheso, parti d'una luengua común altoaragonesa
- Patrimonio cultural que s'en ye amortando en todas las zonas patrimonials
- Solucións como: amostranza, ley de fablas, autoridá lingüistica, etc.

Cuasi se facieron curtas las dos horas que duré. Lo intercambeo d'impresións, entre los que i-veyen la situación dende dentro, y los que la i-veyen dende fueras estié, prexino, enriquecedor pa todos.

No falteron las dudas sobre lo standar (astí he que dar las gracias a Chesús Aranda, "fablero" de Nogará y transuante en Ciresa, por las suyas aclaracións y aportacións ta lo debate).
Ni las comparanzas con lo desarrollo de luengas vecinas, como lo vasco (Amaia Zubillaga y Marta Marín aporteron lo suyo conocimiento) u lo catalán (Sara Lera facié muitas aclaracións de lo sistema d'amostranza catalán).
Ni las esperiencias de educadós como Tere Ubeira, que amuestra en Binéfar.
Ni opinións a favor de la perviviencia de la fabla, como Antonio de lo Gallé u Eloy de Malaño, que se i-troban ubiertos ta cualisquier remeyo que li se pueda meter a la pérdida de lo nuestro patrimonio.
Ni lo tauto y claridá de Pepe en lo desarrollo de la tertulia.

En fin, una esperiencia dinna de repitir. Y bi-habrá que ferlo.